29.08.2017

Bæjarráð - 3055

 
 Bæjarráð Vestmannaeyja - 3055. fundur

 

haldinn Fundarsal að Bárustíg 15 efri hæð.,

29. ágúst 2017 og hófst hann kl. 11.00

 

 

Fundinn sátu:

Páll Marvin Jónsson formaður, Elliði Vignisson bæjarstjóri, Trausti Hjaltason aðalmaður og Stefán Óskar Jónasson aðalmaður.

 

Fundargerð ritaði:  Rut Haraldsdóttir, framkvæmdastjóri stjórnsýslu- og fjármálasviðs

 

Páll Marvin Jónsson sat fundinn í gegnum síma.

 

Dagskrá:

 

1.  

201708085 - Yfirtaka á rekstri Herjólfs

 

Minnisblað vegna möguleika Vestmannaeyjabæjar til að taka við rekstri Herjólfs.

 

Fyrir bæjarráði lágu drög að lögfræðilegri álitsgerð varðandi möguleika Vestmannaeyjabæjar á því að taka yfir rekstur Herjólfs.

Í álitsgerðinni kemur fram sú afstaða Vestmannaeyjabæjar að flutningsþörf hafi á seinustu árum ekki verið fullnægt sem skildi og því væru uppi ríkar kröfur í samfélaginu um fjölgun ferða Herjólfs milli lands og Eyja, og almennt aukna þjónustu. Bent er á að bæjaryfirvöld hafi máli sínu til stuðnings vísað til þess að fyrr á þessu ári hafi t.a.m. komið upp tilvik þar sem biðlisti til að komast með bifreiðar til og frá Vestmanneyjum hafi numið allt að fimm dögum, hráefni hafi skemmst þar sem það komst ekki á milli lands og Eyja, stórir ferðahópar hafa neyðst til að afpanta bókanir hjá ferðaþjónustufyrirtækjum vegna takmarkaðs framboðs ferða og heimafólk upplifi að á tímum sé nánast vonlaust að ætla að ferðast að heiman og heim aftur. Með vísan til þess hafa bæjaryfirvöld lýst eindregnum áhuga á því að taka yfir rekstur Herjólfs með það að markmiði að hann verði rekinn með heildarhagsmuni Vestmannaeyja í huga en ekki eingöngu hámarks nýtingu í hverri ferð og arðsemi.

Í álitsgerðinni eru lögfræðilegt umhverfi og álitaefni efni þar að lútandi rædd og reifuð. Bæði er fjallað um möguleika Vestmannaeyjabæjar til að taka að sér reksturinn sem og möguleika ríkisins til að færa reksturinn yfir til bæjarins án útboðs. Niðurstaða álitsgerðarinnar eru sú að „engar sýnilegar eða augljósar hindranir standi í vegi fyrir því að ríkið semji við Vestmannaeyjabæ um rekstur ferju.

Bæjarráð þakkar drögin að álitsgerðinni og samþykkir þau fyrir sitt leyti. Bæjarráð lítur sem svo á að ekkert lögfræðilegt standi í vegi fyrir samkomulagi við ríkið hvað varðar yfirtöku á rekstri Herjólfs og ítrekar vilja sinn til að svo verði.

Bæjarráð felur bæjarstjóra að fylgja málinu eftir við Samgönguráðherra.

 

   

2.  

201707016 - Stoppdagar Herjólfs vegna viðgerðar haust 2017

 

Bæjarráð fjallaði um fyrirhugaðar viðgerðir á Herjólfi seinnihluta september og afleysingaskip.

Fram kom að ekki hafi enn fengist formlegt svar við því hvaða skip muni leysa Herjólf af á meðan á viðgerðum stendur. Hins vegar lá fyrir tölvupóstur frá Vegamálastjóra þar sem fram kom að vinna við að fá afleysingaskip væri vel á veg komin og vonir stæðu til að á næstu dögum yrði hægt að gera grein fyrir hvernig siglingum yrði háttað á meðan á slipptöku stendur.

Bæjarráð ítrekar það sem áður hefur komið fram um að ekki komi á neinum tíma til greina að skip verði fengið til afleysingar fyrir Herjólf sem ekki hefur fullt haffæri til siglinga bæði í Þorlákshöfn og Landeyjahöfn. Þá leggst bæjarráð eindregið gegn öllum lausnum sem fela það í sér að skip verði tekið af öðrum byggðalögum hér við land til að nýta í Vestmannaeyjum. Þá telur bæjarráð einnig brýnt að öllum takmörkunum á flutningsgetu þeirra skipa sem þjónusta Vestmannaeyjar verði mætt með fleiri ferðum.

 

   

3.  

201707089 - Fasteignamat 2018

 

Erindi frá Þjóðskrá þar sem fram kemur að heildar fasteignamat á Íslandi hækkar um 13,8% frá yfirstandandi ári. Hækkunin í Vestmannaeyjum er 4,8%.

 

Bæjarráð þakkar upplýsingarnar en þær eru í samræmi við það sem búist var við eftir umtalsverðar hækkanir undanfarinna ára.

 

   

4.  

200708078 - Trúnaðarmál lögð fyrir bæjarráð

 

Afgreiðsla samningamáls var skráð í sérstaka trúnaðarmálafundargerð.

 

   

 

 

 

 

                                                                                           

Fleira ekki gert. Fundi slitið kl. 12.30

Vestmannaeyjabær | Ráðhúsinu | Bárustíg 15 | 900 Vestmannaeyjum | Sími: 488 2000 | postur@vestmannaeyjar.is | Kt.: 690269-0159