30.desember 2016 - 12:22

Frístundastyrkur til forráðamanna/foreldra barna 6 til 16 ára

Reglur um frístundastyrk barna 6 til 16 ára með lögheimili í Vestmannaeyjum hafa verið samþykktar og taka gildi 1. janúar 2017. (sjá hér)
 

 

 

Markmið frístundastyrksins er:

 

·       að styrkja 6 til 16 ára börn í Vestmannaeyjum til þátttöku í uppbyggilegu frístundastarfi og auka möguleika til þátttöku óháð efnahag

·       að ýta undir aukna hreyfingu og félagsþátttöku 6 til 16 ára barna

·       að vinna gegn óæskilegu brottfalli í eldri aldurshópum iðkenda

·       auka virkni í frístundartíma barna

 

Frístundastyrkur:

 

·       Frístundastyrkurinn er kr. 25.000,- fyrir einstakling á aldrinum 6 til 16 ára.

·       Frístundastyrkurinn er fyrir börn með lögheimili í Vestmannaeyjum.

·       Frístundastyrk er úthlutað til foreldra/forráðamanna vegna greiddra þátttökugjalda hjá þeim félögum/fyrirtækjum/stofnunum sem hafa gildan samstarfssamning hjá Vestmannaeyjabæ. Lista yfir samstarfsaðila hverju sinni má sjá á heimasíðu Vestmannaeyjabæjar.

·       Gert er ráð fyrir að tímabil hverrar styrkveitingar sé almanaksárið og yrði því styrkurinn til ráðstöfunar frá og með 1. janúar ár hvert.

·       Réttur til frístundastyrks fyrir hvert ár fellur niður í árslok. Ónýttir frístundastyrkir geymast ekki milli ára.

·       Hægt er að skipta frístundastyrknum niður á fleiri en eina tómstundaiðju en ekki þarf að ráðstafa öllum frístundastyrknum í einu.

·       Frístundastyrkur er einungis greiddur út vegna námskeiða sem standa yfir í a.m.k. 6 vikur samfellt.

·       Frístundastyrkurinn gildir ekki sem greiðsla fyrir aðbúnað, ferðalög eða annan tilfallandi kostnað vegna keppni eða þjálfunar.

 

Framkvæmd frístundastyrks

 

Um er að ræða beingreiðslur til foreldra/forráðamanna barns. Úthlutun frístundastyrkja fer fram í gegnum Vestmannaeyjabæ.

 

Foreldri/forráðamaður greiðir þátttökugjöld í nafni barns síns til samstarfsaðila Vestmannaeyjabæjar og framvísar frumriti kvittunar ásamt umsóknareyðublaði til skrifstofu Vestmannaeyjabæjar.

 

Á kvittun skal koma fram:

·       Nafn og kennitala barns

·       Tímabil og heiti námskeiðs

·       Nafn samstarfsaðila

·       Heildarupphæð greiðslu fyrir námskeið

·       Dagsetning greiðslu

·       Undirskrift fulltrúa samstarfsaðila

·       Stimpill samstarfsaðila 

 

Að jafnaði eru styrkir greiddir til foreldra/forráðamanna fyrsta virka dag næsta mánaðar

 

Greiðslur vegna námskeiða hjá nýjum samstarfsaðilum Vestmannaeyjabæjar eru styrktækar í allt að 1 mánuð fyrir samþykki Fjölskyldu- og fræðslusviðs um nýja samstarfsaðilan. Viðkomandi námskeið þarf þó að vera innan almanaksársins.

 

fh. Fjölskyldu- og fræðslusviðs

Jón Pétursson

 

Vestmannaeyjabær | Ráðhúsinu | Bárustíg 15 | 900 Vestmannaeyjum | Sími: 488 2000 | postur@vestmannaeyjar.is | Kt.: 690269-0159